كلمتين من قلبي
بلاش تعلي غلاوة الناس عن ربنا و لا تقدرهم أكتر من ربنا
أمنية الهوارى
11/9/20231 دقيقة قراءة
كلمتين من قلبي ...
كل باب في حياتك يوصلك لربنا أدخله
كل عمل يوطد علاقتك بربنا أعمله و كتر منه
كل وقت عندك تقضيه مع ربنا قضيه بأي عمل تقدر عليه
كل علاقة تبعدك عن ربنا أنهيها فوراً
لو أمك و أبوك عايشين برّك لهم كنز من كنوز الدنيا فما بالك بأخرتك؟
كل حد بيسهل عليك طريق الذنوب أو يعرفك عليها اقطع علاقتك بيه.
كل نعمة عندك بتستخدمها في معصية الله، هتدفع ثمنها في حياتك قبل أخرتك
بلاش تعلي غلاوة الناس عن ربنا و لا تقدرهم أكتر من ربنا
أكرم المحتاج و أطعم المسكين و كتر صدقات
حرك لسانك بذكره و تسبيحه دايماً .
كل عمل يخليك متواصل معاه أعمله بلا تردد و سامح الناس و خليك ودود لطيف اللسان معاهم ،
أنت ما تعرفش مين ممكن يدعي لك أو مين ممكن يدعي عليك ، إياكم و مظالم العباد
ساعد الناس لوجه الله ، أنفق لوجه الله و اتقي الله في نفسك و في دينك و فيمن توليت أمورهم.
اتقي الله فيما تملك.
اتعب في شبابك و ابذل كل طاقتك في عبادة ربنا، بدل ما الحياة تقسى عليك في الكبر و تدفع فواتير متأخرة
إياكم ثم إياكم من حقوق العباد من كلمة ممكن يبقى لهم حق عندك لحد مالهم أوعى تستحله.
و زي ما بتضغطوا على نفسكم علشان حاجات كتير لازم تعملوها ، اضغطوا على نفسكم و قربوا قربوا أوي من ربنا
خلّي علاقتكم بربنا مميزة و خاصة لأن والله في لحظات في عمركم هتعيشوها هتعرفوا أن ولا أي حد و لا أي حاجة ليها قيمة أو ممكن تسندك غير ربنا ،غير رصيد حطيته عنده لأوقات زنقتك.
صحتك ، أبوك أمك أخواتك، أولادك ، صحابك و عشرة عمرك، وظيفتك ، مالك و أملاكك ...
كلها مجرد أسباب أوجدها الله في حياتك ، يعني أمر تشغيلها معاه مش معاك والله .
أفهم أفهم أنك مُستخلف فولائك و اخلاصك لازم يكون للملك الذي استخلفك.
أفكر نفسي و أفكركم نحن مختبرون و الدنيا بيئة الإختبار بس هو ربنا لأنه كريم فمّن علينا بشوية نعم علشان يسهل علينا الاختبار و يشجعنا ننجح فأرجوكم ركزوا في الاختبار.
و بلاش تأمنوا مكر الله أوي أو تفكروا أنكم جامدين و قادرين ، فالله غالب على أمره يُعجِز و لا يعجز يُمهل و لا يُهمل.